ಚಿಕ್ಕಮಗಳೂರು: ಹಿಜಾಬ್ ಧರಿಸಿಕೊಂಡು ಕಾಲೇಜಿನ ತರಗತಿಯಲ್ಲಿ ಕುಳಿತುಕೊಳ್ಳಲು ಅವಕಾಶನೀಡಬೇಕೆಂದು ಒತ್ತಾಯಿಸಿ ವಿದ್ಯಾರ್ಥಿನಿಯರು ಕಾಲೇಜಿನ ಗೇಟಿನ ಹೊರಭಾಗದಲ್ಲಿ ಧರಣಿ ನಡೆಸಿದರು.ಕಾಲೇಜಿನ ಗೇಟಿನ ಹೊರಭಾಗದಲ್ಲಿ ಕುಳಿತು ಓದಿಕೊಳ್ಳಲಾರಂಭಿಸಿದರು. ಬಿಸಿಲು ಏರತೊಡಗಿದಾಗ ಗೇಟನ್ನು ತೆಗೆದು ಒಳಗಡೆ ಪ್ರತಿಭಟನಾ ಧರಣಿ ನಡೆಸಲು ಅವಕಾಶಮಾಡಿಕೊಡಲಾಯಿತು. ಈ ರೀತಿ ಕಾಲೇಜಿನಲ್ಲಿ ಪ್ರತಿಭಟನೆ ನಡೆಯುತ್ತಿರುವುದು ಮೂರನೇಬಾರಿಗೆ.

ಹಿಜಾಬ್‍ಧರಿಸಿ ಕಾಲೇಜಿಗೆ ಪ್ರವೇಶಿಸಲು ಅವಕಾಶನೀಡದಿದ್ದರೆ, ಆನ್‍ಲೈನ್ ತರಗತಿಗೆ ಮುಂದಾಗಬೇಕೆಂದು ಒತ್ತಾಯಿಸಿದ ಪ್ರತಿಭಟನಾಕಾರರು, ಇಂಟರ್‍ನಲ್ಲಿ ಪರೀಕ್ಷೆಗಳು ಸಮೀಪಿಸುತ್ತಿದ್ದು, ಕಾಲೇಜಿನ ಹೊರಭಾಗದಲ್ಲಿ ಪರೀಕ್ಷೆ ಬರೆಯಲು ಅವಕಾಶಮಾಡಿಕೊಡಬೇಕೆಂದು ಆಗ್ರಹಿಸಿದರು.
ಹಿಜಾಬ್‍ಧರಿಸಿ ತರಗತಿಯಲ್ಲಿ ಕುಳಿತುಕೊಳ್ಳಲು ಅವಕಾಶವಿಲ್ಲವೆಂದು ಉಪನ್ಯಾಸಕರು ಪ್ರತಿಭಟನಾನಿರತರಿಗೆ ಹೇಳಿದಾಗ, ಬೇರೆ ಕಾಲೇಜಿನಲ್ಲಿ ಅವಕಾಶಮಾಡಿಕೊಟ್ಟಿದ್ದಾರೆಂದು ವಿದ್ಯಾರ್ಥಿನಿಯೊಬ್ಬರು ಹೇಳಿದಾಗ, ಅದು ಸಮವಸ್ತ್ರ ಇಲ್ಲದ ಕಾಲೇಜಾಗಿರಬೇಕೆಂದರು.

ಮೊದಲಬಾರಿಗೆ ಹಿಜಾಬ್‍ಧರಿಸಿ ಕಾಲೇಜಿಗೆ ಬರಲು ಅವಕಾಶಮಾಡಿಕೊಡಬೇಕೆಂದು ಒತ್ತಾಯಿಸಿ ಪ್ರಿನ್ಸಿಪಾಲರಿಗೆ ಮನವಿ ಸಲ್ಲಿಸಲಾಗಿತ್ತು. ಬಳಿಕ ಪ್ರತಿಭಟನೆ ನಡೆಸಿದ್ದು, ಈಗ ಕಾಲೇಜಿನಲ್ಲಿ ಮೂರನೇಬಾರಿಗೆ ಪ್ರತಿಭಟನೆಗೆ ವಿದ್ಯಾರ್ಥಿನಿಯರು ಮುಂದಾಗಿದ್ದಾರೆ. ಈ ಕುರಿತು ಮಾತನಾಡಲು ಪ್ರಿನ್ಸಿಪಾಲರು ನಿರಾಕರಿಸಿದರು.