ಚಿಕ್ಕಮಗಳೂರು: ಮೆಡಿಕಲ್ ಕಾಲೇಜಿನಲ್ಲಿರುವ ಮೂಲಭೂತ ಸೌಕರ್ಯಗಳ ಕೊರತೆಯ ಬಗ್ಗೆ ಪರಿಶೀಲನೆ ನಡೆಸಲು ವಿಧಾನಸಭೆಯ ಅರ್ಜಿಗಳ ಸಮಿತಿಯು ಭೇಟಿ ನೀಡಿದ ಸಂದರ್ಭದಲ್ಲಿ ರಾಜಕೀಯ ಜಟಾಪಟಿ ನಡೆದಿದೆ. ಅರ್ಜಿ ಸಮಿತಿ ಅಧ್ಯಕ್ಷ ರುದ್ರಪ್ಪ ಲಮಾಣಿ ಅವರ ಎದುರಿನಲ್ಲಿಯೇ ಶಾಸಕ ಹೆಚ್.ಡಿ ತಮ್ಮಯ್ಯ ವಿಧಾನ ಪರಿಷತ್ ಸದಸ್ಯ ಸಿ.ಟಿ. ರವಿ ಅವರ ವಿರುದ್ಧ ಕೆಂಡಕಾರಿದ್ದಾರೆ. ಕಾಲೇಜಿನಲ್ಲಿ ವಿದ್ಯುತ್ ಮತ್ತು ನೀರಿನಂತಹ ಮೂಲಭೂತ ಸೌಕರ್ಯಗಳ ಸಮಸ್ಯೆ ಇದ್ದರೂ, ತರಾತುರಿಯಲ್ಲಿ ಕಟ್ಟಡವನ್ನು ಉದ್ಘಾಟಿಸಿ ವಿದ್ಯಾರ್ಥಿಗಳನ್ನು ಇಲ್ಲಿಗೆ ಶಿಫ್ಟ್ ಮಾಡಿದ್ದಾರೆ. ನೀರು, ವಿದ್ಯುತ್ ಇಲ್ಲ ಅಂದ್ರು ತರಾತುರಿಯಲ್ಲಿ ಉದ್ಘಾಟನೆ ಮಾಡಿ ಇಲ್ಲಿಗೆ ಶಿಫ್ಟ್ ಮಾಡಿದ್ರು. ಅವರ ಮಕ್ಕಳ ಮನೆ ಹಾಳು ಮಾಡಕ್ಕ? ಪೋಷಕರ ಶಾಪ ತಟ್ಟಲ್ವಾ? ಶಿಫ್ಟ್ ಮಾಡಿದ ಅಧಿಕಾರಿಗಳಿಗೆ ಹಾಗೂ ಅಂದಿನ ಜನಪ್ರತಿನಿಧಿಗಳಿಗೆ ಜ್ಞಾನ ಇರಲಿಲ್ವಾ? ಎಂದು ಅವರು ಸಿಟ್ಟಾದ್ರು. 2022 ರಲ್ಲಿ ಏಕಾಏಕಿ ಐದು ಸಾವಿರ ಜನರನ್ನು ಸೇರಿಸಿ ಉದ್ಘಾಟನೆ ಮಾಡಿ ತರಗತಿಗಳನ್ನು ಪ್ರಾರಂಭಿಸಲಾಯಿತು. ಇದು ಮೆಡಿಕಲ್ ಕಾಲೇಜು ಅಂತ ಅಂದಿನ ಚುನಾಯಿತ ಜನಪ್ರತಿನಿಧಿಗಳಿಗೆ ಹಾಗೂ ಜಿಲ್ಲಾಡಳಿತಕ್ಕೆ ಸಾಮಾನ್ಯ ಜ್ಞಾನವಿರಲ್ಲಿಲವೆ ಎಂದು ತಮ್ಮಯ್ಯ ಅಸಮಾಧಾನ ವ್ಯಕ್ತಪಡಿಸಿದರು. ಮೆಡಿಕಲ್ ಕಾಲೇಜು ಸ್ಥಾಪನೆಗೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಅನುದಾನ ನೀಡುತ್ತವೆ. ಆದರೆ, ಕೇಂದ್ರ ಸರ್ಕಾರದ ಮಹಿಳಾ ಮಂತ್ರಿಯೊಬ್ಬರು (ಶೋಭಾ ಕರಂದ್ಲಾಜೆ) ಇಲ್ಲಿದ್ದರೂ, ಅವರ ಗಮನಕ್ಕೂ ಬಾರದೆ ಆ ಕಾರ್ಯಕ್ರಮಕ್ಕೆ ಕರೆಯದೆ ತರಗತಿಗಳನ್ನು ಆರಂಭಿಸಲಾಗಿದೆ. 

ಶುರು ಮಾಡಿದವರಿಗೆ ನೀರಿದ್ದರೆ ಏನು.. ಕರೆಂಟ್ ಇದ್ರೆ ಏನು.. ಅವರಿಗೆ ಅವರ ಹೆಸರು ಬರಬೇಕಿತ್ತು, ಮಾಡಿಬಿಟ್ರು.. ಎಂದು ಹೇಳುವ ಮೂಲಕ ಶಾಸಕ ತಮ್ಮಯ್ಯ ಅವರು ಮತ್ತೊಮ್ಮೆ ಸಿ.ಟಿ. ರವಿ ವಿರುದ್ಧ ಕಿಡಿಕಾರಿದರು.

ಅವರು ಆಗ ಮಾಡಿದ್ದ ಕೊಳಕನ್ನು ನಾವೀಗ ತೊಳೆಯುವಂತಾಗಿದೆ. ಆದರೂ ನಮ್ಮ ಮೇಲೆ ಆರೋಪ ಮಾಡುತ್ತಿದ್ದಾರೆ, ಈಗಿನ ಸರ್ಕಾರ, ಜಿಲ್ಲಾಡಳಿತ, ಚುನಾಯಿತ ಜನಪ್ರತಿನಿಧಿಗಳು ಮೆಡಿಕಲ್ ಕಾಲೇಜನ್ನು ಸರಿಯಾಗಿ ನಿರ್ವಹಿಸುತ್ತಿಲ್ಲ ಎಂದು ಹೇಳುತ್ತಿದ್ದಾರೆ ಎಂದು ತಮ್ಮಯ್ಯ ತಿಳಿಸಿದರು. ಆರೋಪ ಮಾಡಿದವರ ರಾಜಕೀಯ ನಿಲುವುಗಳ ಬಗ್ಗೆಯೂ ಮಾತನಾಡಿದ ತಮ್ಮಯ್ಯ, “ಅವರ ಮನೆ ಮಕ್ಕಳು ಆ ಕಾಲೇಜಿನಲ್ಲಿ ಓದಿದ್ರೆ ಗೊತ್ತಾಗ್ತಿತ್ತು ಅಂತಾರೆ. ಆದ್ರೆ ಆರೋಪ ಮಾಡಿದವರ ಮಕ್ಕಳು ಯುಕೆ, ಫಾರಿನ್‌ನಲ್ಲಿ ಓದುತ್ತಿದ್ದಾರೆ. ನಾವಾದ್ರೂ ನಮ್ಮ ಮಕ್ಕಳನ್ನು ಹೆಮ್ಮೆಯ ಭಾರತ ದೇಶದಲ್ಲಿ ಓದಿಸುತ್ತಿದ್ದೇವೆ. ಭಾರತ ದೇಶದ ಬಗ್ಗೆ ಭಾರೀ ಭಾಷಣ ಮಾಡುವವರು ಫಾರಿನ್‌ನಲ್ಲಿ ಓದಿಸುತ್ತಿದ್ದಾರೆ ಎಂದು ಟೀಕಿಸಿದರು. ಅವರಿಗೆ ಅವತ್ತು ನೀರಿಲ್ಲ ಅಂತ ಈಗ ನಾವು ಅವರ ಮೇಲೆ ಆರೋಪ ಮಾಡುವುದು ಬೇಡ. ಕಾಲೇಜಿಗೆ ಬೇಕಾದ ಅಗತ್ಯ ಮೂಲಭೂತ ಸೌಲಭ್ಯವನ್ನು ಒದಗಿಸೋಣ ಎಂದು ಶಾಸಕ ತಮ್ಮಯ್ಯ ಅವರು ಅರ್ಜಿ ಸಮಿತಿ ಅಧ್ಯಕ್ಷರ ಮುಂದೆ ಪ್ರಸ್ತಾಪಿಸಿದರು.